КР Президентине караштуу Улуттук илимдер академиясына Япониянын Кыргызстандагы толук жана ыйгарым укуктуу элчиси Рюити Хирано элчиликтин биринчи жана экинчи катчылары менен келип, УИАнын президенти Бекмамат Дженбаев жана вице-президенти Гульнара Ботоканова менен жолугушту.
Жалпысынан тараптар Кыргызстан-Япония ортосундагы илимий достук мамилени чыңдоо багытында сүйлөшуштү. “Биз “Ысык-Көлдү сактайбыз” деген беш жылдык долбоорду баштадык. Андан сырткары, чыккан урандын калдыктарын калыбына келтирүү аракеттерин жүргүзүп жатабыз. Бул маселелерде сиздердин тажрыйбаңыздар керек болот”, - деди президент Б.Дженбаев.
“Биз Кыргызстандагы археологиялык казуулар жаатында кызматташууну тереңдетүүгө кызыкдарбыз. Климаттын өзгөрүүсүн жана экологияны сактоого биргелешкен аракеттер керек. Былтыр Ысык-Көлдөгү Тянь-Шань эл аралык борборунда болгон жаш окумуштуулардын экологиялык талкуусуна Япониядан да илимпоздор келип катышты. Япониянын ЖОЖдору жана илимий институттары биология, экология, айлана-чөйрөнү коргоо, кырсыктардын алдын алуу жаатында сиздердин илимий институттар менен изилдөөлөрдү биргеликте жүргүзүүсү үчүн мүмкүнчүлүктөрду карап көрсөк болот”, - деди элчи Рюити Хирано.

Жолугушуу жылуу маанайда өтүп, тараптар мындан ары илимий жаатта тыгыз кызматташууга ниеттерин билдиришти.